Óskemende qar jaýǵan soń jol apattarynyń sany 2 esege artty

ÓSKEMEN. KAZINFORM – Óskemen qalasynda kesheli beri qar jaýǵan soń jol apattarynyń sany kúrt kóbeıdi.

5 qarashada qalada alǵashqy qar jaýdy. Kólik júrgizýshileriniń kóbi dóńgelekterin qystyqqa aıyrbastap úlgermegendikten jáne kólikter arasyndaǵy ara qashyqtyqty saqtamaýdyń saldarynan bir kúnde kóptegen jol apaty boldy. Bul týraly ShQO Polıtsııa departamentiniń baspasóz qyzmetinen habarlady.

- Negizinen Óskemende bir kúnde ortasha eseppen 10, ary ketse 15 jol apaty bolatyn. Al qar jaýǵan soń bir kúnde 23 jol-kólik oqıǵasy tirkeldi. Qazir kóshelerde kóktaıǵaq baıqalyp otyr. Sondyqtan júrgizýshilerden barynsha abaı bolý qajettigin eskertemiz, - delingen aqparatta.

Osy rette, tártip saqshylary qysqy kezeńde jazdyq dóńgelekpen júrýge tyıym salynǵanyn eskertti. Bul talapty saqtamaǵan júrgizýshilerge aıyppul salynady.

Eske salsaq, osyǵan deıin Aqmola oblysynda kóktaıǵaqqa qaramastan jazǵy dóńgelekpen shyqqan júrgizýshiler joldan qaıtarylǵany habarlanǵan.