Óskemende qar tazalaıtyn merdiger uıymdar tapshy

ÓSKEMEN. KAZINFORM – Óskemen qalasynda qar tazalaý jumystaryna tartylǵan merdiger uıymdardyń sany jetkiliksiz.

Qalalyq Turǵyn úı kommýnaldyq sharýashylyq (TÚKSh) bóliminiń málimetinshe, bıyl kóshelerdi tazalaýmen «Taza Óskemen» kásipornyn qosqanda alty merdiger uıym aınalysyp jatyr. Bir aıdyń ishinde olar shamamen 47,7 myń tekshe metr qar shyǵarǵan. Alaıda turǵyndar tazalanbaǵan kóshelerdiń kóptigine jıi shaǵymdanady. 

- Qalada tehnıka jetispeıdi. Bıyl Antıkor «Taza Óskemen» mekemesine tekserý júrgizip, tikeleı kelisimshart jasamaý, tek tender arqyly jumys isteý jóninde nusqama berdi. Alaıda tenderge tek osy alty uıym ǵana qatysa alady. Al jeke kásipkerlerdiń qolynda bir-eki tıegish tehnıka ǵana bolǵandyqtan, olar talaptarǵa saı kelmeıdi, - deıdi bólim basshysynyń orynbasary Marat Tuńǵyshbaev.

Qosalqy merdiger retinde olarmen kelisimshart jasalýy múmkin, biraq konkýrsqa ótinim bergen kezde negizgi merdiger óz tehnıkasyn kórsetedi.

- Barlyq qosalqy merdigerler «Taza Óskemenmen» shart jasaıdy. Olar TÚKSh bólimine tikeleı baǵynbaıdy. Tıisinshe, tólemdi de «Taza Óskemen» júrgizedi jáne talap qoıý quqyǵy da sol mekemede, - deıdi M.Tuńǵyshbaev.

Buryn qalada qar tazalaýmen aınalysatyn 26 merdiger kompanııa bolǵan. Qazir Ahmer, Menovnoe kentterine jáne Shyǵys aýylyna qyzmet kórsetý boıynsha konkýrstar jarııalanǵan. Degenmen, usynylǵan tarıfter tehnıka ıeleri úshin asa tartymdy bolmaı otyr.

Eske salsaq, osyǵan deıin Astanada qar kúreý jumysyna myńǵa jýyq arnaıy tehnıka jumyldyrylǵany habarlanǵan.