Óskemende qańtar oqıǵasyna qatysqan jeti adam sottaldy

ÓSKEMEN. QazAqparat – Óskemen qalasynda qańtar oqıǵasynda jappaı tártipsizdikke qatysqan jeti adam sottaldy, dep habarlaıdy QazAqparat tilshisi.

Qalalyq sot qańtar oqıǵasyna qatysqan 7 adamǵa úkim shyǵardy. Olar 5-6 qańtar kúnderi eldi jappaı tártipsizdikke shaqyrǵany jáne búlikke ózderi qatysqany úshin QR Qylmystyq Kodeksiniń 272-baby boıynsha kináli dep tanyldy.

«Jeteýi de óz qylmystaryn moıyndady. Sot jazany jeńildetetin mán-jaılardy eskere otyryp, tórt aıyptalýshyny bir jyl alty aıǵa bas bostandyǵyn shektedi. Qalǵan úsheýine probatsııalyq baqylaý belgileýmen 4 jylǵa shartty túrde bas bostandyǵynan aıyrý jazasy taǵaıyndaldy», - dep habarlady ShQO Prokýratýrasynyń baspasóz qyzmeti.

Aıta keteıik, búgingi tańda Óskemen men Semeı qalalarynyń sottary jappaı tártipsizdikke barǵan taǵy 36 adamǵa qatysty 6 qylmystyq isti qaraýda.