Óskemende qańtar oqıǵasyna qatysqan 3 adamǵa sot úkimi shyqty

ÓSKEMEN. QazAqparat – Óskemen qalasynda qańtar oqıǵasyna qatysqan 3 adamǵa sot úkimi shyqty, dep habarlaıdy QazAqparat tilshisi.

ShQO Prokýratýrasy baspasóz qyzmetiniń málimetine súıensek, qańtar oqıǵasynda jappaı tártipsizdikke qatysqan Óskemen qalasynyń 3 turǵyny sottaldy.

«Qalalyq sotta Qazaqstan Respýblıkasy Qylmystyq Kodeksiniń 272, 380-baptary (Jappaı tártipsizdikterge qatysý, bılik ókiliniń ómiri men densaýlyǵyna qaýipti emes kúsh qoldaný) boıynsha is qaraldy. Sottalýshylar óz kinásin moıyndaý týraly prokýratýra qyzmetkerlerimen protsessýaldyq kelisim jasasqan. Sot barysynda olardyń istegen isterine shyn júrekten ókinetindikteri de eskerildi», - delingen aqparatta.

Sot sheshimimen eki aıyptalýshy tórt jylǵa shartty túrde bas bostandyǵynan aıyrylsa, úshinshi sottalýshy 4 jyl eki aıǵa bas bostandyǵynan shekteldi. Úkim áli zańdy kúshine engen joq.