Óskemende qańtar oqıǵasyna qatysqan 13 adamǵa sot úkimi shyqty

ÓSKEMEN. QazAqparat – Óskemen qalasynda qańtar oqıǵasyna qatysqan 13 adamǵa sot úkimi jarııa etildi, dep habarlaıdy QazAqparat tilshisi.

ShQO prokýratýrasy baspasóz qyzmetiniń málimetine súıensek, qalalyq sot qańtar oqıǵasyna qatysqan 13 adamǵa qatysty úkim shyǵardy. Іs QR Qylmystyq Kodeksiniń 272-baby 2-bóligi (Jappaı tártipsizdikke qatysý), 296-baby 2-bóligi (Esirtkini ótkizý maqsatynsyz zańsyz saqtaý) boıynsha qaraldy.

«Jeńildetetin mán-jaılardy eskere otyryp, bes sottalýshy úsh jylǵa bas bostandyǵynan shekteldi. Al jeti aıyptalýshyǵa tórt jylǵa bas bostandyǵynan shekteý jazasy taǵaıyndaldy. Osyǵan deıin basqa da qylmys jasaǵan 1 adam úsh jarym jylǵa bas bostandyǵynan aıyryldy. Úkim áli zańdy kúshine engen joq», - delingen aqparatta.

Eske salsaq, Shyǵys Qazaqstan oblysynda qańtar oqıǵasyna qatysty 700-den astam beınejazba tekserilgeni habarlanǵan.