Óskemende qańǵyrǵan janýarlardy aýlaıtyn merdiger tabylmaı tur
ÓSKEMEN. KAZINFORM – Óskemen qalasynda kóshe kezgen janýarlardy aýlaý jumystaryna merdiger anyqtalmady. Ótkizilgen konkýrsqa birde-bir ótinim túspegen.
Memlekettik satyp alý portaly arqyly ótken konkýrs 24 aqpan men 3 naýryz aralyǵynda jarııalanǵan. Qańǵyrǵan janýarlardy aýlaý jumystaryna 7,7 mln teńgeden astam qarajat qarastyrylǵan.
Alaıda konkýrsqa birde-bir uıym qatysýǵa ótinim bermedi. Bul - júıege ózgeris engizilgennen keıin jarııalanǵan alǵashqy tender. Osyǵan deıin ıesiz janýarlardy aýlaý máselesimen oblystyq veterınarııa basqarmasy aınalyssa, endi bul ókilettik qalalyq ákimdikke berilip otyr.
Qala ákimdiginiń málimetinshe, konkýrs qaıta jarııalanady.
- Oǵan janýarlardy qorǵaý uıymdary men janýarlar panajaılarynyń ıeleri qatysady dep úmittenemiz. Janýarlarǵa qatygezdik tanytpaý máselesin dál osy qaýymdastyqtardyń ókilderi únemi kóterip keledi. Sondyqtan biz olardy bul jumysqa belsendi qatysýǵa shaqyramyz, - delingen aqparatta.
Jańa konkýrs ótkizilgenge deıin Óskemendegi qańǵyrǵan janýarlar sanyn retteý máselesi ashyq kúıinde qalyp otyr.
Eske salsaq, osyǵan deıin Óskemende bir aıda 70-ke jýyq adamdy ıt qapqany habarlanǵan.
