Óskemende qamaýǵa alynǵan áıel tergeý ızolıatorynda bosandy
ÓSKEMEN. QazAqparat – Óskemen qalasynda qamaýǵa alynǵan 30 jastaǵy áıel tergeý ızolıatorynda bosandy, dep habarlaıdy QazAqparat tilshisi.
ShQO boıynsha QAJD baspasóz qyzmetiniń málimetinshe, júktiliktiń 8-shi aıynda qamaýǵa alynǵan áıel adam jeke kameraǵa ornalastyrylǵan. Tolǵaq bastalǵan kezde ýaqytsha ustaý ızolıatoryndaǵy medıtsınalyq bólimniń qyzmetkerleri jedel járdem shaqyryp, ony aýrýhanaǵa jetkizdi.
«Ol aman-esen qyz týyp, tergeý ızolıatoryna qaıta oraldy. Biz óz tarapymyzdan barlyq qajetti zattarmen qamtamasyz ettik. Qazir áıelge qatysty tergeý amaldary júrgizilýde. Ol qyzdy kúıeýine jáne týystaryna berý týraly sheshim qabyldady. Mekeme qyzmetkerleri bárin uıymdastyryp, balany kúıeýine tapsyrdy», - dep habarlady vedomstvo ókilderi.
Áıel tergeý ızolıatorynyń qyzmetkerleri úlken kómek kórsetkenin aıtty. Óıtkeni, perzenthanada bolǵan kezde karantınge baılanysty týystary oǵan bara almaǵan.
Aıta keteıik, qamaýdaǵy áıel adam buǵan deıin sotty bolmaǵan. Oǵan qatysty Qazaqstan Respýblıkasy Qylmystyq Kodeksiniń 190-baby (Alaıaqtyq) boıynsha tergeý amaldary júrgizilýde.
