Óskemende K. Marks kóshesi Qazybek bı atyna aýystyrylýy múmkin
ASTANA. QazAqparat - ShQO sotynyń ujymy men Óskemen qalasyndaǵy JMK aýdanynyń turǵyndary Óskemendegi Karl Marks kóshesine Qazybek bıdiń esimin berý týraly ótinish túsirdi, dep habarlaıdy «QazAqparat» HAA tilshisi.
«Eńbek ujymdary qazirgi tańda ózderiniń usynystaryn berip jatyr. Karl Marks kóshesine qatysty Shyǵys Qazaqstan oblystyq sotynyń ujymy men Jibek matalar kentiniń turǵyndary Karl Marks kóshesiniń ataýyn Qazybek bı kóshesi dep ózgertýdi usyndy. Olar qalalyq ákimdikke jazbasha túrde ótinish berdi. Al ákimdiktegi jumys toby osy usynysty qarap, zerdeledi», - deıdi qalalyq máslıhattyń depýtaty Maırash Ekibasova.
Kóshelerdiń ataýyn ózgertý týraly tyńdaý bolatyny týraly aldyn ala BAQ arqyly qala turǵyndaryna habarlanyp, otyrys búgin ótken.
«Tyńdaý kezinde oblystyq sottyń bir sýdıasy, bir aqsaqal, qalalyq ákimdiktiń bir ókili men depýtattar, qala turǵyndary sóz sóıledi. Depýtattardyń birinen «osy kósheniń atyn ózgertý sol dańǵyldyń boıynda turatyn turǵyndardyń qaltasyn qaqpaı ma?» degen suraq qoıdy. Oǵan qala ákiminiń orynbasary Olga Býlavkına jaýap berip, sol kóshedegi 43 úıdiń taqtashasyna 7 myń teńgeden ketetinin aıtty», - deıdi Maırash Ekibasova.
Onyń aıtýynsha, taqtashaǵa qatysty tıisti soma qalalyq bıýdjetten bólinbek.
«Sóz sóılegenderdiń bári jáne qalalyq máslıhattyń depýtattary bir aýyzdan qoldaý bildirdi. Bir ǵana turǵyn qarsylyǵyn aıtty. Depýtattardyń daýysymen bul qujat endi respýblıkalyq komıssııaǵa túsip, sheshim shyǵatyn bolady», - dep túıdi ol.
Aıta ketsek, Karl Marks kóshesi Óskemen qalasynyń eki iri ári jańa aýdany JMK men 19-shaǵyn aýdanyn bólip turǵan basty dańǵyldardyń biri bolyp tabylady.
