Óskemende iz-túzsiz joǵalǵan qyzdy tapqan 10 jasar balalar marapattaldy
ÓSKEMEN. QazAqparat – Óskemen qalasynda iz-túzsiz joǵalǵan qyzdy tapqan eki bala marapattaldy, dep habarlaıdy QazAqparat tilshisi.
Qalalyq Polıtsııa basqarmasy baspasóz qyzmetiniń málimetine súıensek, búgin Sol jaǵalaý polıtsııa bóliminde Saıan Tóleýhanov pen Nuráli Manarbekti marapattaý rásimi ótti. 10 jasar uldar joǵalyp ketken qyzdy izdeýge belsendi qatysyp, onyń qaıda ekendigi týraly ýaqtyly habarlaǵan.
«Sizder jastaryńyzǵa qaramastan shette qalmaı, kómek kórsetýden taıynbadyńyzdar. Polıtsııa qyzmetkerlerimen jáne eriktilermen birge birneshe kún boıy joǵalǵan 14 jastaǵy qyzdy izdeýmen boldyńyzdar. Ata-analaryńyzǵa osyndaı uldardy tárbıelegenderi úshin alǵys aıtqym keledi», - dedi Sol jaǵalaý polıtsııa bóliminiń bastyǵy Raýan Shıbýtov.
Esterińizge sala ketsek, osyǵan deıin Óskemende 14 jastaǵy qyzdyń joǵalyp ketkendigin habarlaǵan bolatynbyz.
3 kúnnen keıin ol aman-esen tabylǵan.
