Óskemende ıtin úıde jalǵyz qaldyryp ketken áıelge 40 myń teńge aıyppul salyndy

ÓSKEMEN. KAZINFORM – Óskemen qalasynda ıtin úıde jalǵyz qaldyryp ketken áıel adamǵa 39 820 teńge aıyppul salyndy.

Osyǵan baılanysty sot isi qalalyq ákimshilik quqyq buzýshylyq ister jónindegi sotta qaralǵan. Belgili bolǵandaı, áıel ıtin úıde qamap, jumysqa ketip qalǵan. Ittiń úre bergeninen mezi bolǵan kórshisi polıtsııa shaqyrdy. Ýchaskelik polıtseı úı janýarlaryn ustaý talaptaryn oryndamaǵany úshin ıttiń ıesine ákimshilik hattama toltyrǵan. 

- Sot barysynda tártip saqshysy ózine aryz túskenin, mekenjaıǵa kelgende páterde eshkimniń joqtyǵyn, ishte ıttiń úrip jatqanyn aıtty. Úı janýarlaryn ustaý jáne serýendetý erejelerine sáıkes olardy qaraýsyz qaldyrýǵa jol berilmeıdi. Sondyqtan áıelge 10 AEK (39 820 teńge) mólsherinde aıyppul salyndy, - delingen sot materıaldarynda.

Aıta keteıik, bul zańdy ekinshi ret buzǵandar 20 AEK kóleminde aıyppul tóleýge mindetteledi.

Eske salsaq, osyǵan deıin Óskemende bir aptada 11 adamdy ıt qapqany habarlanǵan.