Óskemende isker, belsendi áıelder bas qosty
Búgin D.Serikbaev atyndaǵy ShQTÝ-da QR Táýelsizdiginiń 30 jyldyǵy aıasynda «Jahandaný jaǵdaıyndaǵy áıel kóshbasshylyǵy jáne qazaqstandyq biregeılikti nyǵaıtý» taqyrybynda dóńgelek ústel ótti. Oǵan memlekettik qyzmet, sot, quqyq qorǵaý organdary men basqa da túrli salalarda jemisti eńbek etip júrgen, jeke kásibin damytyp otyrǵan názik jandylar qatysty.
«Osyndaı shara oblysta birinshi ret ótkizilip turǵan joq. Ózim Shyǵys Qazaqstanǵa osydan 3 jyl buryn alǵash ret keldim. Maǵan bul óńirdegi áıelderdiń iskerligi, belsendiligi, jumysqa degen adaldyǵy unaıdy. Olar óz salasynda bıik belesterdi baǵyndyryp qana qoımaı, úıde kúıeýlerine áıel, balalaryna ana bolyp júr. Dóńgelek ústeldiń basty maqsaty – názik jandylardyń basyn qosý, qandaı da bir qıyndyqtar bolsa sony talqylaý jáne sheshý joldaryn usyný», - deıdi sharany uıymdastyrýshylardyń biri, psıhologııa ǵylymdarynyń doktory Quralaı Júmekenqyzy.
Jıyn barysynda kóshbasshy áıelder óz jumystary jaıly, qazirgi jetistikterine qalaı jetkenderi týraly sóz qozǵap, ortaq taqyryptardy talqyǵa saldy.
«Qandaı da bir salada jaqsy nátıjege qol jetkizgisi kelgen áıel birinshi kezekte óz ýaqytyn tıimdi paıdalana bilý kerek. Áıel adam jumys kezinde bir sheshim qabyldamas buryn jeti ret ólshep, bir ret kesedi. Al er azamattar jyldam áreket etkisi keledi. Buny da názik jandylardyń bir artyqshylyǵyna jatqyzýǵa bolatyn shyǵar. Ózim búgingi tańda ár túrli baǵyttaǵy 3 respýblıkalyq, 17 oblystyq jobany iske asyryp jatyrmyn. Sondaı-aq jastardy bızneske tartý úshin ýnıversıtettermen birlesip jumys isteýdemiz», - deıdi ShQO kásipkerler palatasy janyndaǵy Іsker áıelder keńesiniń tóraıymy Elena Berezınskaıa-Ábilova.