Óskemende ıntımdik qyzmet kórsetken massaj salony anyqtaldy

ÓSKEMEN. QazAqparat – Óskemen qalasynda ıntımdik qyzmet kórsetilgen massaj salony anyqtalyp, jeńil júristi 4 qyz ustaldy, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, tártip saqshylary Óskemen qalasyndaǵy massaj salondarynyń birinde jeńgetaılyq faktisin anyqtaǵan. Onda bodı-massaj dep atalatyn erotıkalyq sıpattaǵy ıntımdik qyzmetter kórsetilgen.

«Qyzmet quny 15-20 myń teńge aralyǵynda bolǵan. Atalǵan fakti boıynsha 39 jastaǵy mekeme ákimshisi kúdikti retinde ustaldy. Ol ınternettegi saıttar arqyly klıent taýyp otyrǵan. Oqıǵa ornynan klıenttiń ózine kórsetilgen ıntımdik qyzmeti úshin tólegen aqshasy tárkilendi», - delingen aqparatta.

Kúdiktige qatysty QR QK-niń 309-baby boıynsha qylmystyq is qozǵaldy. Osy bapqa sáıkes áıel adam múlkin tárkileı otyryp, bes jylǵa deıingi merzimge bas bostandyǵynan aıyrylýy múmkin.

Budan bólek, polıtseıler Óskemenge basqa qaladan jumys isteýge kelgen 18 ben 31 jas aralyǵyndaǵy 4 jeńil júristi qyzdy ustady. Tıisti saraptamalar taǵaıyndalyp, tergeý amaldary jalǵasýda.

Vıdeodan alynǵan kadr