Óskemende ıisshil ıt esirtki satpaq bolǵan er adamdy ustaýǵa kómektesti
ASTANA. QazAqparat - Óskemende Ulttyq ulannyń kınologtary esirtki satqan adamdy qolǵa túsirdi, dep habarlaıdy «QazAqparat» HAA tilshisi Ulttyq ulannyń «Shyǵys» óńirlik qolbasshylyǵynyń baspasóz qyzmetiniń bastyǵy Baǵdat Amangeldige silteme jasap.
5518 áskerı bóliminiń jaýyngerlik daıarlyq vzvody kınolog qyzmetiniń mamany Aıdos Rahmetov «Suńqar» esimdi qyzmettik ıtimen ShQO esirtki saýdasyna qarsy kúres basqarmasynyń qyzmetkerlerimen birlese otyryp, N.Zaharov esimdi er adamdy ustaǵan.
Qujattardy tekserý kezinde ıt jalma-jan ustalǵan er adamnyń qaltasyn ıiskeı bastaǵan. Tintý barysynda N.Zaharovtyń qaltasynan 50 gr. mólsherdegi sur ári jasyl tústi zaty bar búktelgen túıinshek tabylady. Budan keıin esirtkige qarsy kúres basqarmasynyń qyzmetkerleri Zaharovtyń úıin tekserip, dál osyndaı 28 túıinshek tapqan. Ustalǵan er adam ol zattyń salmaǵy 200 gramm bolatyn marıhýanna ekenin moıyndaǵan. Ol qazir ýaqytsha oqshaýlaǵyshqa qamaldy.
«Shyǵys» óńirlik qolbasshylyǵynyń kınolog qyzmetiniń bastyǵy maıor Evgenıı Jýkovtyń aıtýynsha, kınolog qyzmeti tártip saqshylarymen birge birshama qylmystyń áshkerelegen.
«Osy jyldyń úshinshi toqsany boıynsha ǵana kınolog qyzmetiniń mamandary polıtsııamen birge 18 qylmystyń betin ashty. Arnaıy úıretilgen ıtter qylmys jasamaq bolǵan 10 adamdy ustady. Oqıǵa ornyna iz sýytpaq bolǵan eki adamdy ıtter qýyp jetip, solardyń arqasynda zań buzýshylar qolǵa tústi. 1 kelige jýyq esirkti zattary men 30 lıtr spırtquramdas suıyqtyq anyqtaldy. Urlanǵan múlikter boıynsha eki qylmys ashyldy», - deıdi Evgenıı Jýkov.
