Óskemende «Hronıkadan bolashaqqa» kınolektorııi ótti

Eki kún boıy óskemendikterge birden birneshe derekti fılm — «Qulaly aralynyń adamy», «Sert», «Travel Kazakhstan» jáne «Qýatty seriktes» týyndylary usynyldy. Rejısserler men stsenarıster fılmderdiń qalaı túsirilgeni týraly aıtyp, kórermen suraqtaryna jaýap berdi.

Prezıdent teleradıokesheniniń 30 jyldyǵyna arnalǵan bul jobaǵa qala turǵyndarynyń erekshe qyzyǵýshylyq tanytýy derekti kınonyń óńirdiń mádenı jáne qoǵamdyq ómirindegi mańyzyn aıqyn kórsetti.

— Ár fılm ózekti ári mańyzdy. Zamandastarymyzdyń ómiri týraly syr shertetin, elimizdiń ár kezeńin taspaǵa túsirip, tarıhqa aınaldyrǵan týyndylar. Derekti kıno sheberleriniń shyǵarmashylyq kózqarasynyń arqasynda kórermen búgingi Qazaqstan qoǵamynda bolyp jatqan oqıǵalar men protsesterge jańasha qarap, dál qasymyzda ómir súrip jatqan jandardy tereńirek tanı aldy dep oılaımyn. Prezıdent Teleradıokesheni mazmundy ári oıly derekti kınony damytýǵa zor úles qosyp keledi, — deıdi kınolektorııdiń ashylýynda Shyǵys Qazaqstan oblysy ákiminiń orynbasary Erbol Nurǵalıev.

Qala kórermeniniń nazaryna «Qulaly aralynyń adamy» fılmi usynyldy. Kópshilik úshin kútpegen jerden dál osy kartına eń kóp talqylanǵan týyndyǵa aınaldy. Kaspıı teńizindegi shaǵyn Qulaly aralynda otyz jyldan astam ýaqyt boıy ómir súrip, gıdrometeorologııalyq stantsııany basqaryp kele jatqan Petr Lýpenkovtyń taǵdyry kórermen júregine jol tapty. Fılmde dabyraly oqıǵalar emes, órkenıetten shalǵaıda óz kásibine adal jannyń ómiri arqaý bolǵan. Óskemendik kórermenderdiń aıtýynsha, dál osy adam taǵdyryn shynaıy kórsetý olardyń kóńilinen erekshe oryn alǵan.

— Buǵan deıin aýa raıy boljamynyń artynda qanshalyqty kúrdeli eńbek turǵanyn oılap kórmeppin. Kún saıyn kóretin qarapaıym aqparattyń artynda mol tájirıbe, tynymsyz eńbek pen óz isine adal adam tur. Fılmniń atmosferasy erekshe áser qaldyrdy. Kaspıı men araldyń ásem tabıǵaty men operatorlardyń jumysy kórermendi oqıǵa ortasyna jeteleıdi. Al Petr Ivanovıch alǵashqy mınýttardan-aq zor qurmetke laıyq jan ekenin ańǵartty, — deıdi kórermen Qýanysh Ismaılov.

Kórsetilimge kelgen turǵyndar fılmniń tabıǵattyń kórkem kórinisterimen qatar, adamdardyń talaıly taǵdyrlaryn da sheber kórsete bilgenin jetkizdi.

— Fılmniń kórkemdigi men úılesimi sonshalyq, keı sátte onyń derekti kıno ekenin de umytyp ketesiń. Keıin keıipkerdiń ishki jan dúnıesin, mamandyǵynyń mánin tereńirek túsine bastaısyń. Osyndaı óz isine adaldyq pen tańdaǵan jolyna degen beriktik Memleket basshysy Qasym-Jomart Toqaev jıi aıtatyn «Adal azamat» beınesimen úndesedi, — deıdi óskemendik Inabat Qaısanova.

Sonymen qatar qala jurtshylyǵyna Qazaqstan Prezıdenti Qasym-Jomart Toqaevtyń Japonııaǵa jasaǵan resmı sapary men eki el arasyndaǵy yntymaqtastyqtyń damýy týraly baıandaıtyn «Qýatty seriktes» fılmi de kórsetildi.

— Bul fılmde resmı kezdesýler ǵana emes, ár halyqaralyq kelisimniń artynda turǵan aýqymdy eńbek te jan-jaqty kórsetilgen. Derekti fılm formatynda mundaı protsester kórermenge anaǵurlym túsinikti ári jaqyn qabyldanady. Sonyń arqasynda dıplomatııanyń shynaıy quny men nátıjege jetý úshin aıanbaı eńbektenip júrgen adamdardyń qajyrly eńbegin kórýge múmkindik týady, — deıdi Álııa Muqasheva esimdi turǵyn.

Kartına Qazaqstan dıplomatııasy mektebiniń pragmatızm men uzaqmerzimdi seriktestikke negizdelgen baǵytyn beıneleıdi. Bul Prezıdent Qasym-Jomart Toqaevtyń syrtqy saıasatynyń negizgi qaǵıdattary.

Talaı adam asyǵa kútken týyndylardyń biri — 2024 jylǵy alapat sý tasqynyna arnalǵan «Sert» derekti fılmi boldy. Fılmdegi negizgi oqıǵalar elimizdiń batys óńirinde órbigenimen, ony tamashalaǵan shyǵysqazaqstandyqtardyń kóbi 2010 jyldyń kóktemindegi Shyǵys Qazaqstandy da jaıpaǵan joıqyn tasqyndy eriksiz eske aldy. Sol kezde tabıǵı apat Tarbaǵataı men Samar aýdandaryndaǵy eldi mekenderge orasan zııan keltirip, júzdegen otbasynyń baspanasyn qalpyna keltirý memleket pen barsha qazaqstandyqtyń ortaq mindetine aınalǵan edi.

— 2024 jyly Batys Qazaqstanda tabıǵı apat bolǵanda shyǵysqazaqstandyqtar zardap shekken turǵyndardyń alaquıyn sezimin shyn túsindi. Óıtkeni biz de sondaı qıyndyqty bastan ótkerdik. Búkil óńir bolyp azyq-túlik, kıim-keshek jınap, gýmanıtarlyq kómek jibergenimiz áli esimde. «Sert» fılmi qıyn sátte qazaqstandyqtardyń árdaıym bir-birine demeý bolyp, judyryqtaı jumyla biletinin taǵy bir márte eske saldy. Sondyqtan bul fılmdi mindetti túrde kórý kerek, — deıdi zeınetker Rýmhan Aıdarbekova.

Kınolektorıı qonaqtarynyń erekshe qyzyǵýshylyǵyn týdyrǵan taǵy bir týyndy — elimizdiń týrıstik áleýetine arnalǵan «Travel Kazakhstan» derekti fılmi boldy. Ásirese týrızm salasynyń ókilderi úshin bul kásibı turǵydan mańyzdy jobaǵa aınaldy. Olardyń pikirinshe, osyndaı fılmder ishki týrızmdi damytýǵa jańa kózqaraspen qarap, ózge óńirlerdiń tabysty tájirıbesin zerdeleýge múmkindik beredi.

— Búginde Shyǵys Qazaqstan úshin týrızmdi damytý asa mańyzdy baǵyttardyń biri. Elimizdiń ózge aımaqtarynda týrıstik salanyń qalaı damyp jatqanyn kórý, tájirıbe almasý, óńirimizde júzege asyrýǵa bolatyn tyń ıdeıalardy zerdeleý árdaıym qyzyqty. Mundaı fılmder Qazaqstandy keńinen tanytyp qana qoımaı, aımaqtardyń damýyna jańa serpin beredi, — deıdi ShQO Týrızm keńesiniń tóraǵasy Symbat Ramazanov.

Óskemennen keıin kınolektorıı Qazaqstannyń soltústik-shyǵys óńirlerine jol tartady. Joba ary qaraı — Semeı, Pavlodar jáne Petropavl qalalarynda jalǵasady.

— Biz derekti kınonyń tek festıvalder men arnaıy kórsetilimder aıasynda ǵana qalmaı, qalyń kórermenge jol tartqanyn qaladyq. Bul fılmder búgingi Qazaqstandaǵy adamdar, oqıǵalar men mańyzdy protsester týraly baıandaıdy. Ár kórsetilimnen keıin kórermen óz oılaryn aıtyp, suraq qoıyp, ómirlerinde bolǵan oqıǵalarymen bólisedi. Osyndaı ashyq dıalog — jobanyń basty maqsaty. Sonymen qatar jastardyń derekti kınoǵa degen qyzyǵýshylyǵy artyp kele jatqanyn baıqap otyrmyz, — deıdi Prezıdent Teleradıokesheni Derekti kıno ortalyǵynyń aǵa redaktory Elmıra Іshmuhametova.

Eske sala ketsek, «Hronıkadan bolashaqqa» respýblıkalyq kınolektorııi Prezıdent Teleradıokesheniniń 30 jyldyǵyna oraı uıymdastyrylyp otyr. Joba buǵan deıin Astana, Qyzylorda, Túrkistan, Shymkent, Taraz, Aqtaý, Atyraý, Oral jáne Aqtóbe qalalarynda ótken. Kınolektorıı óz jumysyn 25 qyrkúıekte Almaty qalasynda qorytyndylaıdy.