Óskemende hokkeıshi ólimine qatysty sot úkimi shyqty
ÓSKEMEN. KAZINFORM – Óskemen qalasynda 19 jastaǵy hokkeıshi ólimine qatysty sot úkimi shyqty.
ShQO sotynyń málimetine súıensek, is QR Qylmystyq Kodeksiniń 104-baby 1-bóligine (abaısyzda adam ólimine sebep bolý) sáıkes qaraldy.
Ótken jyldyń 2 tamyzynda B.Aleksandrov atyndaǵy Sport saraıynyń foıesinde hokkeıshi men L. esimdi azamat arasynda janjal shyqqan. Oqıǵa beınebaqylaý kamerasyna túsip qalǵan.
Beınejazbada kóringendeı, L. hokkeıshini moınynan qysyp, biraz ýaqyt boıy jibermeı ustap turǵan.
Ekeýin ajyratqan soń, hokkeıshiniń jaǵdaıy kúrt nasharlap, esinen tanyp qulaǵan. 19 jastaǵy jigit jedel járdem kelgenge deıin kóz jumǵan. Saraptama qorytyndysyna sáıkes, ólimniń sebebi - moıynnyń refleksogendik bóligindegi jaraqattyń saldarynan júrektiń reflektorlyq toqtaýynan bolǵan.
- Sot sheshimimen aıyptalýshyǵa 1 jyl 6 aı merzimge bas bostandyǵynan aıyrý jazasy taǵaıyndaldy. Alaıda «QR Konstıtýtsııasynyń 30 jyldyǵyna baılanysty amnıstııa týraly» zańǵa sáıkes, sottalýshy jazadan bosatyldy. Úkim áli zańdy kúshine engen joq, - delingen aqparatta.
Eske salsaq, osyǵan deıin Astana soty zergerlik buıymdar urlaǵan áıeldiń jazasyn jeńildetkeni habarlanǵan.