Óskemende halyqaralyq standartqa saı keletin tennıs ortalyǵy ashyldy
ÓSKEMEN. QazAqparat – Óskemen qalasynda halyqaralyq standartqa saı keletin tórt qabatty tennıs ortalyǵy ashyldy, dep habarlaıdy QazAqparat tilshisi.
Óskemende tennıs ortalyǵynyń saltanatty ashylý rásimi ótti. Halyqaralyq ITTF standartyna saı keletin ortalyqta zamanaýı jattyǵý zaly men sportshylarǵa arnalǵan ońaltý ortalyǵy ornalasqan.
«Ortalyq balalar men eresekterge, kásipqoılar men áýesqoılarǵa óz esigin aıqara ashyp otyr. Munda erekshe qajettiligi bar adamdar da kelip tennıs oınaı alady. Biz úzdik jattyqtyrýshylardy jumysqa tarttyq. Ústel tennısi ortalyǵy buqaralyq sportty damytyp qana qoımaı, álemdik deńgeıdegi týrnır men jarystardy ótkizýge múmkindik beredi», - dedi aımaq basshysy Danıal Ahmetov.
Ortalyqta bir mezette 250 adam jattyǵa alady. Birinshi qabatta daıyndyq júrgizý úshin 40 ústel, ekinshi qabatta jarys ótkiziletin 18 tennıs ústeli bar.
Búginde tennıs – olımpıadalyq sport túri. ShQO-da 458 tennıs sektsııasynda 11 myńdaı sportshy jattyǵady.
Esterińizge sala ketsek, osyǵan deıin Alakól mańyndaǵy áýejaı týrıstik maýsymǵa deıin jóndelip bitetinin habarlaǵan edik .
