Óskemende halyqaralyq konferentsııa ótip jatyr
D.Serikbaev atyndaǵy Shyǵys Qazaqstan memlekettik tehnıkalyq ýnıversıtetinde ótip jatqan aýqymdy sharaǵa Ál Farabı atyndaǵy Qazaq memlekettik ýnıversıtetiniń, Pavlodar memlekettik pedagogıkalyq ýınversıtetiniń, Á.Marǵulan atyndaǵy arheologııa ınstıtýtynyń, R.Súleımenov atyndaǵy Shyǵystaný ınstıtýtynyń, «Qyrym araly» ǵylymı-restavratsııalaý zerthanasynyń ǵalymdary men reseılik sarapshylar qatysýda.
Konferentsııa qonaqtary áýeli «Úlken Altaı» murajaıyna saıahat jasap, óńir tarıhyn «Kóne Altaıdyń» maketinen tanýǵa múmkindik aldy. Keshke deıin jalǵasatyn shara eki kezeńnen turady. Túske deıin arheolog Zeınolla Samashev, shyǵystanýshy Merýert Abýseıtova, sýretshi-restavrator Qyrym Altynbekov sheberlik saǵattaryn ótkizse, tústen keıin konferentsııanyń plenarlyq otyrysy ótedi.
Otyrysta sóz alatyn ǵalymdar Altaıdy Elbasynyń «Uly dalanyń jeti qyry» atty maqalasyna arqaý bolǵan qundylyqtardyń altyn besigi retinde dáriptep, asa qundy ǵylymı derekter usynady dep kútilýde.
Belgili fılosof Ǵarıfolla Esim bastaǵan konferentsııa spıkerleri «Qazaq dalasyndaǵy etalondyq eskertkishter», «Quraı-Shý metallýrgııasy», «Kendi Altaı órkenıeti», «Shyǵystyń «shabandoz» mádenıeti», «Botaı» mádenıeti» taqyryptaryn qozǵap, tyń derekterge toly baıandamalar jasaıdy.