Óskemende halyqaralyq izdeýde júrgen esirtki tasymaldaýshy ustaldy
ÓSKEMEN. QazAqparat – Óskemen qalasynda halyqaralyq izdeýde júrgen esirtki tasymaldaýshy ustaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, polıtsııa qyzmetkerleri Erkebulan Ordabaev pen Aıbek Sııazbekovten 50 jastaǵy Óskemen turǵyny kómek suraǵan. Belgili bolǵandaı, tanysy úıinde spırttik ishimdik ishý kezinde ony uryp-soǵyp, belgisiz baǵytta ketip qalǵan.
«Atalǵan fakti boıynsha tártip saqshylary dereý tekserý júrgizdi. Nátıjesinde atalǵan er adamnyń 2021 jyldyń maýsym aıynan beri esirtki tasymaldaǵany úshin halyqaralyq izdeýde júrgeni anyqtaldy», - delingen aqparatta.
Qazirgi ýaqytta 1981 jylǵy azamat qamaýǵa alynǵan. Oǵan qatysty QR QK-niń 297-baby 2-bóligi boıynsha sotqa deıingi tergeý amaldary júrgizilýde.
