Óskemende Halyqaralyq balalardy qorǵaý kúnine oraı «7 keremet» atty festıval ótti

ÓSKEMEN. QazAqparat – Óskemen qalasyndaǵy Sol jaǵalaý saıabaǵynda 1 maýsym – Halyqaralyq balalardy qorǵaý kúnine oraı merekelik shara ótti, dep habarlaıdy QazAqparat tilshisi.

«7 keremet» atty festıval jyl saıyn dástúrli túrde uıymdastyrylyp kele jatyr. Sonyń aıasynda balalar túrli boıaýlarmen asfaltqa sýret salyp, mýltfılm keıipkerlerimen sporttyq oıyndar oınap, karaoke batle-ǵa qatysyp, kvest sheshti.

Kelýshiler kontsert tamashalap, saıqymazaqtarmen oıyn alańynda kóńil kóterdi. Budan bólek, balalarǵa dastarhan jaıylyp, balmuzdaq taratyldy.

«Saıabaq aýmaǵy 7 alańǵa bólinip, ár jerde qyzyqty sharalar uıymdastyryldy. Jalpy tek Óskemende ǵana emes, bul kúni oblystyń túkpir-túkpirinde balalarǵa arnalǵan sharalar ótkizilip jatyr. Aımaq boıynsha 180 myńnan astam bala qamtylady dep josparlanyp otyr», - dedi ShQO Bilim basqarmasynyń bas mamany Qanat Oralbek.

Esterińizge sala ketsek, osyǵan deıin Shyǵys Qazaqstanda 564 oqýshy «Altyn belgige» úmitker ekendigin habarlaǵan edik.

Ashyq kózderden alynǵan foto