Óskemende halyqty buralqy ıtterden qorǵaý úshin arnaıy qor qurylýy múmkin

ÓSKEMEN. KAZINFORM – Óskemen qalasynda qoǵam belsendileri turǵyndardy ıesiz ıtterden qorǵaý maqsatynda arnaıy qor qurýdy usyndy.

Olar shaǵyn aýdandarda ıesiz janýarlar sanynyń kúrt artqanyn atap ótti. Al zań sheńberinde qoldanylyp jatqan sharalar máseleni tolyq sheshe almaı otyr.

— Aýlalar men kóshelerdegi ıtterdiń kóbeıýi balalar men eresekterdi úreılendiredi. Biz basqa da zooqorǵaýshylarmen birigip, júıeli túrde jumys isteý úshin qor qurýdy jón kórdik. Bul janýarlardy aýlaý, zararsyzdandyrý, chıpteý jáne olar panalaıtyn oryndardyń jumysyn baqylaý úshin qajet, - deıdi qala turǵyny Sáýle Ýrýstımova.

Qoǵam belsendileri bul bastama janýarlardy jappaı joıýdy kózdemeıtinin, kerisinshe, popýlıatsııany órkenıetti jolmen rettep, turǵyndardyń qaýipsizdigin qamtamasyz etýge baǵyttalǵanyn jetkizdi. Ol úshin janýarlardy ashyq esepke alý júıesin engizip, bılik pen veterınarııalyq qyzmettermen tıimdi ózara is-qımyl ornatý usynylǵan. 

ShQO veterınarııa basqarmasy máseleniń ózektiligin rastady. 2025 jyly óńirde janýarlardy aýlaý men zararsyzdandyrýǵa 36 mln teńgeden astam qarajat bólingen. Alaıda bul qarjy nebári 600 janýardy ǵana qamtýǵa múmkindik bergen.

— Úı janýarlaryn kútip-ustaý jaýapkershiligi olardyń ıelerine júkteledi. Al ýchaskelik jáne aýdandyq ortalyqtar ıesiz janýarlar sanyn baqylaýǵa kómektesýi tıis. Atýdy qoldaný tek janýar agressıvti bolyp, adam ómirine naqty qaýip tóndirgen jaǵdaıda ǵana júzege asyrylady, - dedi oblystyq veterınarııa basqarmasynyń bólim basshysy Erlik Ordabaev.

Qazirgi tańda Óskemende qańǵyrǵan ıtterge arnalǵan toǵyz panajaı jumys isteıdi. Olardyń basym bóligi eriktilerdiń qaıyrymdylyq qarajaty esebinen qarjylandyrylady. 

Eske salsaq, osyǵan deıin Býrabaı turǵynynyń ıtterge atqan oǵy áriptesine tıgeni habarlanǵan.