Óskemende halyq shaǵymynan soń kóshelerge kóktaıǵaqqa qarsy tuz sebilmeıtin boldy
ÓSKEMEN. KAZINFORM – Óskemen qalasynda turǵyndar shaǵymynan soń kóshelerge kóktaıǵaqqa qarsy tehnıkalyq tuz sebilmeıtin boldy.
Qys bastalǵaly qala kóshelerinen shyǵarylǵan qardyń jalpy kólemi 80 myń tekshe metrden asyp otyr. Bul kórsetkish byltyrǵy sáıkes kezeńimen salystyrǵanda eki esedeı kóp.
Byltyr qala turǵyndary kóshelerge tuzdyń sebilýine qarsylyq bildirgen bolatyn. Olardyń aıtýynsha, tuz qoldanylatyn qospa kólik dóńgelekteri men aıaq kıimdi búldiredi. Turǵyn úı-kommýnaldyq sharýashylyǵy bóliminiń málimetinshe, bıyl tehnıkalyq tuzdy qoldanýdan bas tartylǵan.
- «Taza Óskemen» kommýnaldyq mekemesiniń qyzmetkerleri greıderlermen joldardy qar men muzdan tazartady. Kóktaıǵaqqa qarsy materıal retinde tuzdy paıdalanýdan bas tartý týraly sheshim qabyldandy. Búginde 100% qum qoldanylady. Joldardy, trotýarlardy, jaıaý júrginshiler ótkelderin, jeke kóshelerdi, kireberis joldardy, avtobýs aıaldamalaryna deıingi joldardy jáne basqa da aýmaqtardy tazalaý jumystary kúndelikti júrgizilip jatyr, - delingen aqparatta.
Eske salsaq, osyǵan deıin BQO-da kóktaıǵaqtan jaraqat alǵandar sany 860-tan asqany habarlanǵan.