Óskemende Gematologııa ortalyǵy salynyp jatyr
ÓSKEMEN. QazAqparat – Óskemen qalasynda Gematologııa ortalyǵynyń qurylysy júrgizilýde, dep habarlaıdy QazAqparat tilshisi.
Aımaq basshysy Danıal Ahmetov qurylys jumystary barysyn tekserip qaıtty. Gematologııa ortalyǵy eki ǵımarattan turady, atap aıtqanda negizgi jáne pansıonat.
«Negizgi korpýs ǵımaraty 5 blokqa bólingen. Máselen, B blogynda jilik maıyn transplantatsııalaıtyn balalar bólimshesi, sondaı-aq balalarǵa arnalǵan statsıonar jáne klınıkalyq-dıagnostıkalyq zerthana ornalasady. Jilik maıyn transplantatsııalaıtyn eresekterge arnalǵan bólim V blogynda bolady. Sol jerde eresekter statsıonary, dıagnostıkalyq jáne ambýlatorııalyq bólimshe ashylady», - dedi oblys ákimi.
Sáýlelik dıagnostıka men termoterapııa bólimsheleri, transfýzıologııa ortalyǵy, polımerazdy jáne tizbekti reaktsııa zerthanasy, operatsııalyq bólim jáne tsıtostatıkterdi ortalyqtandyrylǵan ósirý G blogynda oryn teppek. Al patomorfologııalyq jáne tsıtologııalyq bólimder, FISH jáne genetıkalyq zerthana, lımfomasomatıka jáne hırýrgııa statsıonary D blogynda ornalasady.
Sonymen qatar jobada oıyn bólmesi, psıholog kabıneti, oqý synyptary, konferentsııa zaly jáne dámhana qarastyrylǵan. Táýlik boıǵy statsıonarda 146 tósek-orynnan, kúndizgi statsıonarǵa 30 jáne gemodıalız úshin 4 tósek-oryn bolady. Kópbeıindi konsýltatıvtik-dıagnostıkalyq bólimshede bir aýysymda 150 kelýshige qyzmet kórsetiledi. Dárigerler men qyzmetkerler shet memleketterdiń úzdik ortalyqtarynda oqýdan ótedi.
«Bıyl barlyq 5 blok boı kóteredi. Negizgi qurylys-montajdaý jumystary aıaqtalmaq. Munda kórsetiletin joǵary tehnologııalyq medıtsınalyq qyzmetterdi paıdalana otyryp, eń úzdik halyqaralyq tájirıbe engiziletin bolady. Budan bólek, oblystyń densaýlyq saqtaý salasyn joǵary deńgeıge kóterýdegi óte mańyzdy element – ǵylymı-zertteý bazasyn damytýdy kózdep otyrmyz. Jalpy, Gematologııa ortalyǵy elimizdiń jetekshi medıtsınalyq uıymdarynyń biri bolmaq», - dedi Danıal Ahmetov.
