Óskemende evakýator jaıaý adamdy qaǵyp óltirdi
ÓSKEMEN. QazAqparat - Óskemende jol apatynan bir adam mert boldy, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.
Vedomstvonyń málimetinshe, jol-kólik oqıǵasy 16 qazan kúni keshki saǵat 18.20 shamasynda bolǵan.
«Sońǵy aqparat boıynsha, «Toyota» markaly evakýatordyń 62 jastaǵy júrgizýshisi Báıterek aınalma jolynda kele jatyp, Jeńis dańǵylyna burylatyn tusta rettelmegen jaıaý júrginshiler jolynan ótip bara jatqan adamdy qaǵyp ketken. Kóliktiń astynda qalǵan adam dene jaraqatynan oqıǵa ornynda kóz jumdy» dep habarlady ShQO polıtsııa departamentiniń basshysy Saǵat Mádıev.
Qazirgi tańda Óskemen qalasynyń polıtsııa qyzmetkerleri oqıǵanyń mán-jaıyn anyqtap jatyr.
«Jol apatyn kórgen kýágerlerdiń 102, 23-26-13 nómirlerine habarlasýyn ótinemiz» deıdi qalalyq polıtsııa.
