Óskemende esirtki isi boıynsha 20 jastaǵy kúdikti qamaldy
ÓSKEMEN. KAZINFORM — Óskemende ınternet-dúken arqyly esirtki taratýǵa qatysy bar degen kúdikpen 20 jastaǵy azamat ustaldy
Ol esirtki zattaryn ólshep, arnaıy túıinshekterge bólip, býyp-túıýmen aınalysqan. Basqa oblystyń turǵyny ınternetten ońaı tabys tabý týraly habarlandyrý arqyly zańsyz jumysqa tartylǵan.
Atqarǵan jumysy úshin oǵan krıptovalıýtamen aqy tólengen. Kúdikti «Qarasora» jedel-profılaktıkalyq is-sharasy barysynda ustaldy. Jeke tintý kezinde odan untaq tárizdi zat salynǵan 350 túıinshek tabylǵan. Sondaı-aq esirtki býyp-túıilgen jaldamaly páterden taǵy 28 túıinshek pen eki ydysqa salynǵan zat tárkilendi.
Saraptama nátıjesinde tárkilengen zattyń α-PVP psıhotroptyq zaty ekeni anyqtaldy. Onyń jalpy salmaǵy 635 gramdy qurady. Atalǵan derek boıynsha qylmystyq is qozǵalyp, kúdikti ýaqytsha ustaý ızolıatoryna qamaldy.
Aıta ketelik Aqtóbede sıntetıkalyq esirtki taratatyn iri arnanyń joly kesildi.
