Óskemende esirtki satqan top ustaldy
ÓSKEMEN. Qazaqparat - Óskemen qalasynda esirtki qylmysyna qarsy kúres basqarmasynyń qyzmetkerleri geroınniń iri partııasyn qolǵa túsirdi, dep habarlaıdy QazAqparat tilshisi.
Oblystyq polıtsııa departamentiniń habarlaýynsha, 4 adamnan turatyn qylmystyq top Óskemen qalasynyń aýmaǵynda geroın satyp kelgen. Olardyń eń úlkeniniń jasy 43-te bolsa, eń jasy 34-te ekeni anyqtalyp otyr.
17 mamyr kúni saqshylar qylmystyq toptyń 40 jastaǵy múshesin «Strelka» aýdanynda toqtatady. Kólikti tintý kezinde artqy oryndyqtan belgisiz untaq salynǵan qaltashalar shyqqan. Keıin saraptama onyń 46 gramm geroın ekenin anyqtaǵan.
«Qylmystyq toptyń ózge múshelerin ustaý kezinde taǵy da esirtki tabyldy. Jalpy 110 gramm geroınniń taralýyna tosqaýyl qoıyldy. Bul 230 ortasha dozaǵa teń. Kúdiktilerdi tintý kezinde esirtkiden bólek 760 myń teńge aqsha shyqty. Quryqtaý operatsııasyna Ulttyq ulan sarbazdary da atsalysty. Kúdiktiler ýaqytsha qamaý ızolıatoryna alynǵan. Olardyń ústinen Qylmystyq kodekstiń 297-baby boıynsha sotqa deıingi tergeý bastaldy», - deıdi oblystyq polıtsııa departamentiniń baspasóz qyzmetiniń mamany Azamat Raısov.
