Óskemende Ertis ózeninde jolaýshy tasymaldaıtyn shaǵyn kemeler maýsymy aıaqtalýǵa jaqyn
ÓSKEMEN. KAZINFORM – Óskemen qalasyndaǵy Ertis ózeninde jolaýshy tasymalymen aınalysatyn shaǵyn kemeler maýsymy qyrkúıek aıynyń sońynda aıaqtalady.
Shahar turǵyndary arasynda keńinen tanymal shaǵyn kemeler 29 qyrkúıekten bastap jumysyn toqtatady. Maýsymnyń aıaqtalýy aýa raıynyń qolaısyzdyǵyna jáne kemelerdi qysqy kezeńge daıyndaýǵa baılanysty bolyp otyr.
– Shaǵyn kemeler tek jyly kúnderde jolaýshy tasymaldaı alady. Al sýyq túsken kezde toqtap, tehnıkalyq qyzmetterge jetkiziledi, – dep habarlady kemelerge ıelik etetin «Belaleks» kompanııasynan.
Aıta keteıik, Sol jaǵalaý saıabaǵyna qaraı qatynaıtyn marshrýt 11 qyrkúıekten beri jabylǵan. Al qaıyqtardy jalǵa berý qyzmeti odan da erte toqtaǵan. Kompanııa ókilderiniń aıtýynsha, bıylǵy maýsymda jolaýshy turaqty boldy. Ásirese jaz aılarynda kememen qydyrystaýǵa nıet bildirýshiler sany artqan.
– Óskemende ózen kóligine suranys joǵary. Qala turǵyndary men qonaqtary ózenmen serýendeýdi unatady. Kóbisi etnoparkke jetý nemese jaı ǵana Ertispen qydyrý úshin arnaıy tramvaılardy tańdaıdy, – dedi «Belaleks» kompanııasynyń ókilderi.
Shaǵyn kemeler kelesi kóktemde burynǵy formatta qaıta jumysyn bastaıdy.
Eske salsaq, buǵan deıin Ulyqbek Tumashınov Shyǵys Qazaqstanda týrızmdi damytýǵa kedergi keltiretin máselelerdi ataǵany habarlanǵan.