Óskemende Ertis kópiri astyndaǵy jańa jol turǵyndar arasynda daý týdyrdy

ÓSKEMEN. KAZINFORM — Óskemen qalasynda Jańa jyl qarsańynda paıdalanýǵa berilgen Ertis kópiriniń astyndaǵy jol búginde jurt arasynda daý-damaı týdyrdy. 

Ertis kópiriniń astymen ótetin jańa jol jaǵalaý boıyndaǵy qozǵalysty jeńildetip, aınalma jolǵa túsetin júktemeni azaıtý maqsatynda salynǵan. Alaıda qazir buǵan jaıaý júrginshiler razy emes, narazy.

Olardyń aıtýynsha, buryn bul aýmaq serýendeýge yńǵaıly bolǵan. Endi ózen boıymen ótý qaýip týdyryp otyr. 

— Jaǵalaý boıymen kele jatqanda baıaǵydaı ózenge emes, jan-jaǵymyzǵa qarap júrýge májbúr boldyq. Sebebi kólik astyna túsip ketpeý úshin abaı bolýǵa týra keledi. Bul óte yńǵaısyz. Qysta qaı jermen júrýge bolatynyn, qaı jerdiń jol ekenin ajyratý tipten qıyn, — deıdi qala turǵyny Evgenııa Samoılova.

Ákimdiktiń málimetinshe, jaıaý júrginshiler jaǵalaý boıyndaǵy burynǵy marshrýtty paıdalanýy tıis. Al jańa ótkel ázirge tolyqtaı abattandyrylmaı iske qosylyp ketken.

— Bul ýchaske ázirge jumys rejıminde ashyldy. Tolyq abattandyrý jumystary aýa raıy turaqtalǵannan keıin júrgiziledi, — delingen habarlamada.

Al júrgizýshiler bolsa, kópir astynan shyǵatyn joldyń geometrııasyna qatysty másele kóterip otyr. Olardyń aıtýynsha, júrgizýshi jolaqtarǵa barynsha muqııat bolý qajet, ásirese túngi ýaqytta nemese kólik aǵyny tyǵyz bolǵan kezde.

— Ol jerdiń joly túp-túzý emes. Alǵash júrgen adam traektorııany «boljaýǵa» májbúr. Qos syzyqtyń ústine shyǵyp ketý op-ońaı. Ózimdi beıne bir synaqtan ótip jatqandaı sezindim: sál qatelik jiberseń, birden ereje buzǵan bolyp sanalasyń, — deıdi júrgizýshi Erlan Baqytjanov.

Qozǵalystyń jańa syzbasy áleýmettik jelilerde de qyzý talqylanyp jatyr. Qoldanýshylar vıdeolar jarııalap, syzbalar salyp, jeke tájirıbelerimen bólisýde.

Eske salsaq, osyǵan deıin Óskemendegi Ertis kópiriniń astyndaǵy jańa jol qashan ashylatyndyǵy jaıly jazǵanbyz.