Óskemende Ertis arqyly ótetin jańa kópirdiń jobasy jasalyp jatyr
ÓSKEMEN. KAZINFORM – Óskemende kópten beri kóterilip kele jatqan kólik keptelisi máselesi sheshimin tabýy múmkin. Sol úshin qaladaǵy Ertis ózeni arqyly ótetin jańa kópir salynbaq.
Qazir jobalyq-smetalyq qujattamany ázirleý jumystary júrgizilip jatyr. Bul jumystar 2025 jyldyń jeltoqsan aıyna deıin aıaqtalýy tıis.
ShQO Jolaýshy kóligi jáne avtomobıl joldary basqarmasynyń basshysy Nurjan Jumadilovtiń aıtýynsha, jobalaýdy «Qazaq PromTransProekt» JShS qolǵa alǵan.
— Jańa kópir Serikbaev kóshesi men Menovnoe aýylyn baılanystyryp, qala ortalyǵyndaǵy kólik qozǵalysyn yńǵaıly etedi. Qala turǵyndary osy kópirdiń salynýyn talaı jyldan beri kútip júr. Endi jobalaýdy aıaqtap, qurylysty bastap ketý qajet, — deıdi ol.
Búginde qalada eki ǵana kópir bar. Kólikterdiń kóbi negizgi segiz jolaqty Ertis kópirimen qatynaıdy. Al eski Ponton kópiriniń jartysy káriz kollektoryndaǵy jóndeý jumystaryna baılanysty byltyr kúzden beri jabyq tur. Keshki qarbalasta kólik aǵyny negizgi kópirge shoǵyrlanyp, uzyn-sonar keptelis týyndaıdy.
Aldyn ala derek boıynsha, kópirdiń uzyndyǵy 420 metrdi, estakadanyń uzyndyǵy 290 metrdi, kireberis joldarynyń uzyndyǵy 1,2 shaqyrymdy quraıdy. Jobanyń quny — 115 mlrd teńge mólsherinde.
Eske salsaq, buǵan deıin ShQO-daǵy eski aýstrııalyq jol jóndelýi múmkindigi jaıly jazǵanbyz.