Óskemende Ertistiń boıymen kater júretin bolady

ÓSKEMEN. QazAqparat – Óskemen qalasyndaǵy «Samal» saıabaǵy men Ózen vokzaly aralyǵynda kater júrmek, dep habarlaıdy QazAqparat tilshisi.

«Belaleks» kompanııasy men «Voıaj» týrısterge arnalǵan fırmasy qolǵa alǵan jobaǵa qala ákimdigi qoldaý bildirgen. Endi turǵyndar Ózen vokzaly mańynan «Samal» saıabaǵyna katermen jete alady.

«Belaleks» kompanııasynyń dırektory Oleg Belovtyń aıtýynsha, áýel basta 3 kater qatynaıtyn bolady. Onyń árqaısysyna 30 adamnan syıady.

«Osy sııaqty kater Semeıde de júredi. Bul týrızdi damytýǵa birden-bir múmkindik. Demalys kúnderi basqa baǵyttarda qatynaımyz», - deıdi ol.

Jospar boıynsha katerler 9 mamyrda júre bastamaq. Óskemen qalasynyń ákimi Jaqsylyq Omar katermen Sol jaǵalaý mýzeı-saıabaǵyna da aıaldaýǵa usynys jasady.

«Katerler eń birinshi Ózen vokzaly men «Samal» saıabaǵy arasynda júredi. Keıinnen Sol jaǵalaý mýzeı-saıabaǵynda aıaldama jasaımyz. Bul joba negizinen ótken jyly bastalǵan. Ary qaraı ony damyta túsýimiz kerek», - dedi shahar basshysy.