Óskemende Ertiske qulap ketken boıjetken qutqaryldy
ÓSKEMEN. QazAqparat - Óskemende jaǵalaýdaǵy jóndeý jumystary júrgizilip jatqan jerde boıjetken abaısyzda Ertis ózenine qulap ketti.
Janushyrǵan daýysty estigen qurylysshylar men sol mańdaǵy qoǵamdyq kúzet kezeginde júrgen eki polıtseı Jedel basqarý ortalyǵynan habar kelip jetken soń kómekke umtylady. Olar kúsh jumyldyryp qıyn jaǵdaıda qalǵan 19 jastaǵy stýdent qyzdy qutqardy. «Qyzdy qutqarý ońaıǵa soqpady, óıtkeni bul tusta ózenniń aǵysy qatty ári tereń edi, sondaı-aq jaǵalaı sýdan úsh metrdeı bıik bolatyn. Sondyqtan jaǵadaǵylar qurylys kranyn paıdalandy», - dedi ShQO ІІD baspasóz qyzmetiniń jetekshisi Baqytjan Torǵaev.
Boıjetkendi polıtsııa qyzmetkerleri Rýstam Aǵybaev pen Raýan Jaqsylyqov jedel járdem kelgenshe polıtsııa beketine jetkizip, qurǵaq kıim berip, ystyq shaı usynǵan. Boıjetken oqıǵanyń qalaı bolǵanyn aıtyp bergen. Ol jaǵalaýda qydyryp júrip, jaǵalaýdyń qorshaýyna shyǵyp (parapet) otyrǵan. Qatty aǵysqa qarap otyrǵanda kenetten basy aınalyp sýǵa qulap ketken.
Dárigerler boıjetkenniń densaýlyǵyna aıtarlyqtaı qaýip tónbegenin anyqtady. Óıtkeni ol sýyq sýda kóp bolmaǵan ári polıtseıler ony der kezinde jylytyp salqyn tııýdiń aldyn aldy.
