Óskemende Ertis ózeniniń túsi nelikten ózgerip ketkeni belgili boldy

ÓSKEMEN. QazAqparat – Óskemende Ertis sýy túsiniń ózgerýine baılanysty tekserý qorytyndysy jarııa etildi, dep habarlaıdy QazAqparat tilshisi.

Bıylǵy tamyz aıynyń sońynda buqaralyq aqparat quraldarynda jáne áleýmettik jelilerde vıdeo tarap, onda Óskemendegi Ertis sýy túsiniń ózgergeni kórsetilgen bolatyn. Vıdeo avtory «Ǵashyqtar alleıasy» tusynda Ertis arnasy sýynyń aǵaryp ketkenin kórsetip, odan jaǵymsyz ıis shyǵyp turǵanyn aıtqan.

Shyǵys Qazaqstan oblystyq ekologııa departamenti atalǵan fakti boıynsha sýdan synama alynǵanyn, sýdyń túsi neden ózgerip ketkeni saraptama nátıjesinen keıin belgili bolatyndyǵyn málim etti.

«Maı» AQ-ǵa qatysty jospardan tys tekserý aıaqtaldy. Zertteý jumystary nátıjesinde maı zaýytynan shyǵatyn aǵyndy sýlardyń hımııalyq quramy Ertis arnasyna quıylǵan sýmen birdeı ekeni anyqtaldy. Tikeleı ózen arnasyna aǵyzylatyn sýda ammonıı tuzy ruqsat etilgen shekten 93 ese, nıtrıtter 10 ese, fosfattar 115,4 ese asyp ketken. Sý qoryn qorǵaý jáne tazalaý qurylystaryn paıdalaný erejelerin buzý faktisi boıynsha atalǵan mekemege qatysty ákimshilik is qozǵaldy», - delingen departamenttiń baspasóz qyzmeti taratqan aqparatta.

Eger zaýyt basshylyǵy zań buzýshylyqtarmen kelisetin bolsa, jeńildetilgen tártip boıynsha salynatyn aıyppuldyń jalpy somasy 2 664 810 teńge bolady.