Óskemende erteń keıbir jolaýshylar avtobýsy jolǵa shyqpaıdy
ÓSKEMEN. QazAqparat - Óskemendik 3 tasymaldaýshy kompanııa bir kúndik ońtaılanǵan rejimge kóshetinin málimdedi. Erteń qala kóshelerinde 14 marshrýt boıynsha avtobýstar saǵat 9.00-16.00 aralyǵynda júrmeýi múmkin, dep habarlaıdy QazAqparat tilshisi.
Tasymaldaýshy kompanııa ókilderi mundaı qadamǵa sharasyzdyqtan baryp otyrǵandaryn aıtady.
«Qosymsha qun salyǵy men korporatıvtik tabys salyǵy boıynsha bastalǵan daý prokýratýra organynyń bastamasymen sotta qaralýy tıis bolatyn. Qala prokýrorynyń talabyn sot organdary keri qaıtardy. Sonyń saldarynan 4 kompanııanyń moınyndaǵy salyq qaryzy búginde 5 mlrd teńgege jaqyndady. Osyndaı jaǵdaıǵa qaramastan, tasymaldaýshylar 2016 jyly bekitilgen tarıf boıynsha qyzmet kórsetip júr. Ol kezde benzın baǵasy 115 teńge bolsa, qazir 160 teńgeniń aınalasynda. Tasymaldaýshy kompanııalardyń budan ári shyǵynmen jumys isteýge jaǵdaıy joq. Sondyqtan kúndizgi ýaqytta ońtaılanǵan rejimde jumys isteımiz dep sheshim qabyldady», - deıdi ShQO shaǵyn jáne orta bıznes qyzmetkerleriniń kásipodaq tóraǵasy Galına Kazantseva.
Mundaı sheshimdi «ATTs BEST», Vebas» jáne «Voska» JShS qoldap otyr. Salyq qaryzy eń qomaqty sanalatyn «Rost» JShS bul bastamadan qalys qalypty. Atalmysh 3 kompanııanyń basshylary osy sheshim týraly qala ákimdigine bir apta buryn eskertkenderin aıtady.
«Sizderdiń aldaryńyzda ǵana osy másele boıynsha qala basshylyǵynyń aldynda boldyq. Olar naýryzdyń 26-syna deıin burynǵy rejim boıynsha jumys isteı turýymyzdy ótindi. Biraq ol ýaqytqa deıin qandaı da bir kómek kórsetetin túri joq. Sondyqtan erteń birneshe baǵyt boıynsha avtobýstar saǵat 9.00-16.00 aralyǵynda júrmeıdi» - deıdi Galına Kazantseva.
Ońtaılanǵan rejimge kóshetin avtobýstardyń tizimi tómendegideı: «1», «8», «8A», «19», «11», «25», «32», «12», «33», «39», «42», «361», «371», «68».
«Atalǵan marshrýttar tańerteń 9.00-ge deıin, keshke tek 16.00-den bastap qana júredi. Kelesi kúni Reseı Prezıdentiniń saılaýy ótetindikten, barlyq marshrýttar qalypty rejimde jumys isteıdi. Onyń ar jaǵynda Naýryz meıramy tur. Eger, osy aralyqta qala bıligi eshqandaı shara qoldanbasa, 26-naýryzdan bastap qaıtadan ońtaılanǵan rejimge kóshemiz. Ol kezde bizdiń avtobýstar úshin barlyq jeńildikterdiń kúshi joıylady» - deıdi «ATTs BEST» JShS ókili Elena Rıadınskıh.
Oblystyq kásipkerler palatasynyń dırektory Igor Shatskııdiń aıtýynsha, bul máselemen qazirgi tańda Qazaqstan kásipkerleriniń quqyqtaryn qorǵaý jónindegi ýákil Bolat Palymbetov aınalysýda.
«Tasymaldaýshy kompanııalardyń sharasyz áreketi uzaqqa sozylmaıdy dep úmittenemiz. Bári resmı ýákildiń shaǵymyn sot oryndary qabyldaýyna baılanysty bolyp tur» - deıdi Igor Shatskıı.
Eske sala keteıik, qala ákimi Qýat Tumabaev qoǵamdyq kólik qatynasyna reforma jasaýǵa nıetti ekenin el aldyndaǵy esebi kezinde málimdegen bolatyn. Sonyń negizinde Óskemende «elektrondy bılet» júıesi engizilmek.
