Óskemende erli-zaıyptylar esirtki jarnamalaýmen aınalysqan
ÓSKEMEN. KAZINFORM – Óskemen qalasynda esirtki jarnamalaýmen aınalysqan erli-zaıypty ustaldy.
Tártip saqshylary qaladaǵy shaǵyn aýdandardyń birinde esirtki zattaryn satýmen aınalysatyn saıttardy jarnamalaıtyn paraqshalardy ǵımarattardyń qabyrǵalaryna jabystyryp júrgen eki adamdy anyqtaǵan.
«41 jastaǵy er adam men onyń 28 jastaǵy jubaıyn qylmys ornynan jedel ýákilder ustady. Zattaı dálel retinde esirtki jarnamalanǵan paraqshalar tárkilendi. Kúdiktilerdiń aıtýynsha, bul paraqshalarda tyıym salynǵan dári-dármekterdi satatyn ınternet-dúkender týraly aqparat jazylǵanyn bilmegen», - dep habarlady ShQO Polıtsııa departamentiniń baspasóz qyzmeti.
Áıel adam óz sózinde bunyń jumys berýshiden alǵan tapsyrma ekendigin, paraqshalardy qala boıynsha japsyrý kerek bolǵanyn túsindirgen. Eńbek jaǵdaıymen kelisken ol, kúıeýin ózimen birge jumys isteýge shaqyrǵan. Alaıda zań boıynsha bilmestik jaýapkershilikten bosatpaıdy.
«Qazirgi ýaqytta kúdiktilerge qatysty esirtki, psıhotroptyq zattardy, olardyń analogtaryn jarnamalaýmen aınalysqany úshin qylmystyq is qozǵaldy. Erli-zaıypty tórt jylǵa deıin bas bostandyǵynan aıyrylýy múmkin», - delingen aqparatta.
Eske salsaq, osyǵan deıin ShQO-da kelini enesiniń atynan bildirtpeı 2 jarym mln teńge nesıe rásimdep alǵany habarlanǵan.
