Óskemende er adam órtengen úıden 3 balany alyp shyqty

ÓSKEMEN. QazAqparat – Óskemen qalasynyń turǵyny órtengen kórshi úıden 3 balany alyp shyqty, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, Óskemendegi Kásipodaq kóshesinde ornalasqan jer úıde órt shyqty.

Órt sóndirýshiler kelip jetkenge deıin kórshi Qaırat Sherepanov 5, 4 jáne 2 jastaǵy úsh balany syrtqa alyp shyqqan. Olardyń anasy da janyp jatqan úıden óz betinshe shyǵyp úlgerdi.

«Kóp uzamaı kelgen órt sóndirý bólimshesiniń qyzmetkerleri jalpy aýdany 30 sharshy metr aýmaqqa jaıylǵan qyzyl jalyndy aýyzdyqtady. Jedel árekettiń arqasynda jalynnyń ary qaraı taralýyna jol berilmedi. Aldyn ala málimet boıynsha órttiń shyǵý sebebi - peshti paıdalaný kezinde qaýipsizdik talaptaryn saqtamaýdan bolǵan», - delingen aqparatta.

Tilsiz jaýdy sóndirýge barlyǵy 4 tehnıka men 16 adam jumyldyrylǵan.

Aıta keteıik, Qaırat Sherepanov «Óskemen-Vodokanal» kásipornynda slesar bolyp jumys isteıdi.

Foto: ShQO Tótenshe jaǵdaılar departamenti