Óskemende er adam aýlada turǵan kólikti metallolomǵa ótkizip jibergen
ASTANA. KAZINFORM — Óskemende polıtseıler 25 jastaǵy jergilikti turǵynnyń birneshe qylmysqa qatysy baryn anyqtady. Kúdikti eki avtokólikti zańsyz ıelenip, sondaı-aq kólikti esirtkige masań kúıde aıdaǵan.
Alǵashqy derek boıynsha, er adam turǵyn úı aýlasynda uzaq ýaqyt boıy turǵan Mazda Cronos avtokóligin baıqaǵan. Ol mobıldi qoldanba arqyly evakýator shaqyryp, kólikti alyp ketken. Keıin avtokólikti metallolomǵa ótkizip, odan 35 myń teńge alǵan. Osy áreketimen kólik ıesine shamamen 1 mln teńge kóleminde materıaldyq shyǵyn keltirilgen.
Arada bir apta ótken soń kúdikti taǵy da qylmys jasaǵan. Qonaqta bolǵan kezinde ol kireberiste turǵan Lada 21703 avtokóliginiń kiltin baıqap, ony ıemdenip, kólikti ruqsatsyz aıdap ketken.
— Patrýldik polıtsııa qyzmetkerleri avtokólikti toqtatqan kezde júrgizýshiniń kólik basqarý quqyǵynan jeti jyl merzimge aıyrylǵany anyqtaldy. Medıtsınalyq kýálandyrý nátıjesinde onyń aǵzasynda kannabınoıdtar bary anyqtalyp, esirtkilik masań kúıde kólik aıdaǵany rastaldy, — delingen habarlamada.
Qazirgi ýaqytta atalǵan faktiler boıynsha qylmystyq ister tergelip jatyr. Kúdikti ýaqytsha ustaý ızolıatoryna qamaldy.
Eske salaıyq, buǵan deıin Almaty turǵyny 3 jyl buryn satqan kóligin urlap ketkenin jazǵanbyz.
