Óskemende er adam 12 metrlik bıiktikten qulap ketti
ÓSKEMEN. QazAqparat - ShQO TJD «Órt sóndirý qyzmeti jáne apatty-qutqarý jumystary» MM arnaıy mamandanǵan jasaǵynyń qutqarýshylary jeldetý shahtasynan 12 metrlik bıiktikten qulaǵan 49 jastaǵy er adamdy qutqardy, dep habarlaıdy «QazAqparat» HAA tilshisi TJ departamentine silteme jasap.
Oqys oqıǵa búgin tańǵy ýaqytta Óskemen qalasy Sátpaev kóshesi, 82/4 mekenjaıynda bolǵan.
Jumysshylar brıgadasy shatyrda jóndeý jumystaryn júrgizgen. Zardap shegýshige qosymsha quraldar qajet bolyp, joly qysqartýdy uıǵarǵan. Kóshe jaqtan ǵımarattar arasyndaǵy jabynǵa kelgen er adam eni 1 metr, uzyndyǵy 5 metr bolatyn sańylaýdy baıqamaǵan. Aıaǵyn shalys basyp, 12 metrlik bıikten qulap túsken. Kómek týraly qońyraý túsip, qutqarýshylar oqıǵa oryna shapshań jetti. Zardap shegýshini bir ǵana jolmen - arqanmen kóterip alý ǵana múmkin edi.
«Biz eki jerden ilmek jasap, arqan ildik. 2 qutqarýshy tómenge tústi. Er adam óziniń tiri ekenin bildirdi, suraqtarymyzǵa jaýap berdi. Ony qatty zembilge salyp, joǵaryǵa kóterdik jáne jedel járdem qyzmetkerlerine tabystadyq», - dedi arnaıy mamandanǵan jasaqtyń ınjener-qutqarýshysy Álibek Tókenov.
Syrttaı teksergende zardap shegýshiniń aıaq-qoldarynyń ashyq synyǵy baıqaldy. Naqty tujyrymdy dárigerler beredi.
Óz kezeginde ShQO TJD azamattarǵa asa muqııat bolýdy, qaýipsizdik erejelerin saqtaýdy eske salady.
