Óskemende emhanaǵa baram dep joǵalyp ketken bala kitaphanadan tabyldy
ÓSKEMEN. QazAqparat - 14 qańtar kúni tańerteń emhanaǵa baarmyn dep joǵalǵan bala búgin kitaphanadan tabyldy. Bul týraly QazAqparat tilshisine oqýshynyń týysqany Evgenııa Grıgoreva málim etti.
Segizinshi synypta oqıtyn Artem Grıgorev keshe tańerteń emhanaǵa ketkennen oralmaǵan bolatyn. Balanyń joǵalǵany týraly aqparat saıttar men áleýmettik jelide tarap, kóshelerge sýreti men habarlandyrý ilingen. Balanyń ata-anasy polıtsııaǵa keshke bir-aq aryz túsiripti. Bul iske polıtsııa ókilderinen bólek eriktiler qoǵamy da atsalysty.
Joǵaldy delingen Artem búgin túste Pýshkın atyndaǵy oblystyq kitaphanadan tabyldy.
«Keshe kúni boıy úıge oralar dep úmittendik. Sol úshin de polıtsııaǵa keshke habarlasqanbyz. Túni boıy áleýmettik jelige habarlandyrý taratqan bolatynbyz. Jańa ǵana sheshesi habarlasyp, Artemniń tabylǵanyn jetkizdi. Onyń qasynda polıtsııa qyzmetkerleri otyrǵan kórinedi. Balanyń nege úıge qonbaǵanyn solar anyqtaıdy. Anasynyń aıtýynsha, bala din aman. Densaýlyǵyn tyńǵylyqty teksertetinimiz anyq» - deıdi Evgenııa Grıgoreva.
Bul málimetti oblystyq polıtsııa departamenti de rastady.
«Bala polıtsııa bólimine jetkizildi. Bizdiń qyzmetkerler oǵan profılaktıkalyq túsindirý jumystaryn júrgizip jatyr. Sodan keıin ata-anasyna tapsyrylady. Artemniń aıtýynsha, kesheden beri kitaphanada bolǵan. Al túnde tanysynyń úıine qonǵan. Ata-anasyna qolynda baılanys quraly bolmaǵandyqtan habarlasa almaǵanyn aıtyp otyr. Onyń áleýmettik jelidegi sýretin kitaphana qyzmetkerleri kórip, polıtsııaǵa habar bergen. Onyń ómirine eshqandaı qaýip joq, din aman» - deıdi oblystyq polıtsııa departamenti memlekettik til jáne aqparat bóliminiń basshysy Aıgerim Nurǵazına.
