Óskemende elektr qýatymen júretin avtobýstar qatynaýy múmkin
ÓSKEMEN. QazAqparat - Óskemenge elektr qýatymen júretin avtobýstar ákelindi. 30 kúndik synaqtan súrinbeı ótse, bul avtobýstar qoǵamdyq kólik retinde dızelmen júretin avtobýstardyń ornyn aýystyrýy múmkin, dep habarlaıdy QazAqparat tilshisi.
Qala ákiminiń baspasóz qyzmetiniń habarlaýynsha, synaqtan ótip jatqan kólik áli satyp alynbaǵan. Onyń taǵdyry 30 kúnnen keıin belgili bolmaq.
«Elektrobýstar dızeldi avtobýstardan áldeqaıda únemdi. Olar bir kúnde qala ishinde 250 shaqyrym jol basyp ótedi. Dızeldi avtobýstar bul ýaqyttyń ishinde 125 lıtr otyn jaǵady. Al elektrobýstar 189 kVt qýat jumsaıdy. Aqshaǵa shaqqanda, bul 2,5 myń teńge» - deıdi atalmysh kompanııanyń ókili Roman Mırazımov. Onyń aıtýynsha atalmysh kólikti qýattaý úshin 10 mınýt jetip jatyr. Osy ýaqyt ishinde jınaǵan qýatpen ol 70-100 shaqyrym jol júretin kórinedi.
«Bul kólik qoldanystaǵy avtobýstardan 6-8 esege tıimdi. Ázirge ony satyp alǵan joqpyz. 30 kúnniń ishinde ózin qaı qyrynan kórsetedi, soǵan baılanysty. Eger synaq sátti ótse, biz elektrobýstardy qoǵamdyq kólik qozǵalysyna tartqan tórtinshi qala atanamyz» - deıdi qala ákimi Qýat Tumabaev.
Baspasóz qyzmetiniń habarlaýynsha, avtobýsty usynyp otyrǵan kompanııa qýattaý quraldaryn da ornatyp berýge mindet alyp otyr. Ázirge elektrobýstyń qaı baǵytqa shyǵarylatyny belgisiz.
