Óskemende elektr energııasynyń jıi óshý sebebi aıtyldy
ÓSKEMEN. KAZINFORM – Óskemen qalasyn energııamen jabdyqtaýshy «BESK» kompanııasy jaryqtyń apatty jaǵdaıda jıi óshýiniń sebebin túsindirdi.
Kompanııanyń málimetinshe, negizgi sebep - kóktem mezgilinde jer asty sýy deńgeıiniń kóterilýi. Bul kabeldik jelilerdiń tehnıkalyq jaı-kúıine keri áserin tıgizedi.
- Elektr energııasynyń apatty jaǵdaıda jıi óshýiniń basty sebebi - kóktemgi jer asty sýynyń áseri. Sonyń saldarynan kabeldik mýftalar zaqymdanyp, apatty jaǵdaılar men elektrmen jabdyqtaýda úzilister týyndaıdy, - delingen aqparatta.
Qazirgi ýaqytta kezekti apattan keıin «KShT» qosalqy stantsııasynda qalpyna keltirý jumystary júrgizilip jatyr. Aqaýdy joıýǵa tıisti brıgadalar jumyldyrylǵan.
- Jóndeý jumystaryna baılanysty birqatar mekenjaıda, onyń ishinde Ývalıev jáne Qazybek bı kóshelerinde elektr energııasyn berý ýaqytsha shekteldi, - delingen habarlamada.
Eske salsaq, osyǵan deıin Óskemende úsh kún qatarynan sol jaǵalaýdaǵy myńdaǵan turǵyn jaryqsyz qalǵany habarlanǵan.
