Óskemende ekopatrýl quryldy
ÓSKEMEN. QazAqparat - Óskemende ekologııalyq qaýipsizdik ortalyǵynda (EQO) ekologııalyq patrýl quryldy. Kez kelgen qala turǵyny ekologııalyq buzýshylyqty baıqaǵan jaǵdaıda, ony sýretke túsirip, jiberýi úshin WhatsApp nómiri belgilendi, dep habarlaıdy «QazAqparat» HAA tilshisi.
Endi árbir qala turǵyny ózi baıqaǵan ekologııalyq buzýshylyq týraly habarlamany tikeleı mamandarǵa jibere alady.
Olarǵa qoqys tastaıtyn jerler, aǵashtardy keskende shyǵatyn qoqyndylar, tútini burqyraǵan avtokólikter, kásiporyndar men uıymdardyń túrli shyǵaryndylary - zııandy zattardyń aýaǵa shyǵarylýy, sýlardaǵy qaldyqty zattar jáne t.b. jatady.
Sonymen qatar, ekologtar qala turǵyndarynyń baıqaǵan buzýshylyqtarynyń naqty mekenjaıy jáne qaı ýaqytta anyqtalǵany týraly habarlaýdy suraıdy. «Asa qaýipti jaǵdaıda baqylaýshy organdardyń sol mekemege ótinishtiń negizinde tekseris júrgizýi úshin buzýshylyqty baıqaǵan adamnyń baılanys málimetteri, mekenjaıy men tolyq aty-jóni qajet bolady», - dedi EQO mamany Elena Polıantseva.
