Óskemende ekologter sary tústi qar jaýǵany týraly aqparatty tekserip jatyr
ÓSKEMEN. KAZINFORM — Óskemendikter qala aýmaǵynda jaýǵan qardyń túsi ózgergenin baıqaǵandaryn aıtyp jatyr.
Turǵyndardyń aıtýynsha, qardyń túsi sary-qońyr, al keı jerlerde qyzǵylt. Mundaı qubylys ásirese óndiristik aımaqtarǵa jaqyn mańda baıqalǵan. Áleýmettik jelilerde taraǵan foto-vıdeolar kópshiliktiń nazaryn aýdaryp, túrli saýal týyndatty.
Osyǵan baılanysty Shyǵys Qazaqstan oblysy Ekologııa departamentiniń mamandary oqıǵa ornyna shyǵyp, qar jamylǵysynan synama alýǵa kiristi.
— Qazirgi ýaqytta qalanyń ár aýmaqtarynda qar synamalary alynyp jatyr. Zerthanalyq taldaýlar aıaqtalǵannan keıin qar túsiniń ózgerý sebebi anyqtalyp, tıisti baǵa beriledi, — dep habarlady departament ókilderi.
Vedomstvo mamandary zertteý nátıjeleri men aldaǵy qabyldanatyn sharalar týraly qosymsha aqparat beriletinin atap ótti.
Eske salsaq, osyǵan deıin Almatyda ekologııalyq shekteýleri bar aımaq belgilengeni habarlanǵan.
