Óskemende ekologter lastanǵan bulaq sýyna qatysty tekserýdi bastady
ÓSKEMEN. KAZINFORM – Óskemen qalasynda ekologter lastanǵan bulaq sýyna qatysty tekserý júrgizip jatyr.
Kesheli beri áleýmettik jelide Nazarbaev dańǵylynda ornalasqan «Valentına» saýda úıiniń mańyndaǵy bulaqtyń laılanyp ketkeni kóringen vıdeo tarap ketti. Buryn osynda tolyp júretin úırekter de múlde kórinbeıdi.
Turǵyndar arasynda bulaq boıynda ornalasqan saýda nysandary sýdy lastaýy múmkin dep boljam jasap jatqandar bar. Onyń aq-qarasyn ShQO ekologııa departamenti anyqtamaq.
«Ekologter sol jerge baryp, sý synamasyn aldy. Qazirgi ýaqytta synaq zerthanasynda tıisti jumystar júrgizilýde. Nátıjesi belgili bolǵan soń birden jarııa etiledi», - dep habarlady departamenttiń baspasóz qyzmetinen.
Eske salsaq, osyǵan deıin Óskemen qalasy turǵyndary aýa sapasynyń kúrt nasharlap ketkenine shaǵymdanǵan soń ekologter tekserý júrgizgeni habarlanǵan.