Óskemende ekologııalyq talaptardy saqtamaǵan kásiporynǵa 20 mln teńge aıyppul salyndy
ÓSKEMEN. KAZINFORM — Óskemen qalasyndaǵy «Kaztsınk» kásipornynda ekologııalyq talaptardyń buzylǵany anyqtaldy.
ShQO Ekologııa departamentiniń mamandary Óskemendegi qolaısyz meteorologııalyq jaǵdaılar kezinde «Kaztsınk» JShS metallýrgııalyq kesheniniń Óskemen metallýrgııalyq alańyna qatysty jospardan tys tekserý júrgizdi.
— Sonyń barysynda aýaǵa taraıtyn shyǵaryndylar kózderine tıisti ólshemder jasalyp, belgilengen normatıvterdiń artqany anyqtaldy. Atap aıtqanda, kúkirt dıoksıdi boıynsha normadan — 3,5 ese, kómirtek oksıdi boıynsha — 2 ese, azot oksıdi boıynsha — 1,5 ese artqan, — dep habarlady departamenttiń baspasóz qyzmetinen.
Anyqtalǵan derekter shań-gaz ustaý jabdyqtarynyń tolyq kólemde tıimdi jumys istemeıtinin jáne gazdardy jobalyq deńgeıde tazartýdy qamtamasyz etpeıtinin kórsetti.
— Sonymen qatar qolaısyz meteorologııalyq jaǵdaılar kezinde emıssııalardy tómendetý talaptarynyń saqtalmaýy ekologııalyq ruqsat sharttarynyń buzylýyna ákelgeni belgili boldy. Tekserý qorytyndysy boıynsha kásiporynǵa 20 mln teńge kóleminde aıyppul salynyp, anyqtalǵan buzýshylyqtardy joıý týraly nusqama berildi, — delingen aqparatta.
Eske salsaq, osyǵan deıin ekologııalyq talapty eskermegen Pavlodar elektrolız zaýytyna aıyppul salynǵany habarlanǵan.
