Óskemende ekologııalyq pasportty ázirleý bes jylǵa kesheýildedi

ÓSKEMEN. KAZINFORM — Óskemen qalasynda jańa ekologııalyq pasport ázirleý jumystary bastaldy. Qujatta aýaǵa taralatyn zııandy zattardyń kólemi eseptelip, ruqsat etilgen shyǵaryndylar mólsheri belgilenedi.

Óskemende ekologııalyq pasportty ázirleý bes jylǵa kesheýildedi
Foto: Kazinform\JI

Qalanyń ekologııalyq pasporty resmı túrde shekti jol beriletin shyǵaryndylardyń jıyntyq tomy dep atalady. Bul qujatty jańartý jumystary merdigerlerdiń óz mindettemelerin oryndamaýyna baılanysty týyndaǵan sot daýlary saldarynan bes jyl boıy júzege aspaı kelgen.

Jumystar mamandandyrylǵan tabıǵat qorǵaý prokýratýrasynyń aralasýynan keıin qolǵa alyndy. Prokýratýra qala ákimdigine naqty oryndaý merzimderin kórsete otyryp, tıisti nusqama berdi.

— Shekti jol beriletin shyǵaryndylardyń jıyntyq tomy — oblys ortalyǵy úshin asa mańyzdy ári ózekti qujat. Qala ósip, damyp keledi. Jańa kásiporyndar ashylyp, kólik aǵyny artyp, turǵyn úıler salynýda. Bul qujatta ár zaýyttyń, qazandyqtyń jáne avtokólik aǵynynyń aýa sapasyna tıgizetin áseri jan-jaqty taldanady. Jergilikti atqarýshy organ ony ár tórt jyl saıyn jańartyp otyrýǵa mindetti. Prokýratýranyń nusqamasyna sáıkes, qazirgi ýaqytta qala ákimdigi osy jumyspen aınalysyp jatyr, — deıdi ShQO ekologııa departamenti basshysynyń mindetin atqarýshy Áset Súleımenov.

Halyq sany 10 myńnan asatyn eldi mekender úshin shekti jol beriletin shyǵaryndylardyń jıyntyq tomyn ázirleý talaby 2021 jyly Ekologııalyq kodekste bekitilgen.

Shyǵys Qazaqstanda bul talap Óskemen, Rıdder jáne Altaı qalalaryna qatysty. Alaıda atalǵan qalalardyń eshqaısysynda ázirge jańartylǵan ekologııalyq pasport joq.

Rıdderde joba bıýdjet qarajatynyń qysqarýyna baılanysty toqtatylsa, Óskemende qujat ázirleý jumystary merdigerlerdiń kinásinen sozylyp ketken.

— Oblystyq tabıǵı resýrstar jáne tabıǵat paıdalanýdy retteý basqarmasy qujatty ázirleýge birneshe ret áreket jasady. Alaıda eki ret qatarynan merdigerler mindettemelerin oryndamady. Jobaǵa shamamen 30 mln teńge qarastyrylǵanymen, jumys tapsyrylmaǵandyqtan, qarajat tólengen joq. Aqtóbe men Almatydan kelgen jobalaýshy kompanııalar óńirdiń erekshelikterin múlde bilmegendikten, kelisý kezeńine de jete almady. Kompanııalardyń biri josyqsyz merdiger dep tanyldy. Bul jaǵdaılar 2022 jáne 2023 jyldary boldy. Odan keıin uzaqqa sozylǵan sot protsesteri bastalyp, sonyń saldarynan bes jyl ýaqytymyzdy joǵalttyq, — deıdi ShQO tabıǵı resýrstar jáne tabıǵat paıdalanýdy retteý basqarmasy basshysynyń orynbasary Aıaýlym Qaıdarova.

Sot protsesteriniń uzaqqa sozylýyna baılanysty mamandar áli kúnge deıin eskirgen esepterdi paıdalanyp keledi. Sol derekterge sáıkes, Óskemende atmosferaǵa taralatyn zııandy zattardyń jyldyq jalpy kólemi 158,7 myń tonnany quraıdy.

Onyń 56,7 paıyzy avtokólikke, 34,4 paıyzy ónerkásiptik kásiporyndarǵa, al 8,9 paıyzy jeke sektordaǵy peshpen jylytylatyn úılerge tıesili.

Jańa ekologııalyq pasport qala aýasynyń lastanýyna árbir kózdiń naqty úlesin anyqtaýǵa múmkindik beredi. Konkýrs qorytyndysy boıynsha normatıvterdi ázirleýshi bolyp «EKOSERVIS-S» JShS belgilendi.

— Bıyl Óskemende shekti jol beriletin shyǵaryndylar normatıvterin ázirleý jumystary bastaldy. Tamyz aıynyń sońynda qorshaǵan orta sapasynyń nysanaly kórsetkishteri bekitildi. Onda lastanýdyń negizgi kózderi men olardyń shyǵaryndylarynyń kólemi kórsetilgen. Qazir ázirlenip jatqan normatıvter shyǵaryndylardyń ruqsat etilgen mólsherin naqty anyqtap, aýa lastanýyn azaıtýǵa baǵyttalǵan aldaǵy sharalardy qalyptastyrýǵa múmkindik beredi. Qazirgi ýaqytta jaǵdaıdy jaqsartý úshin qoǵamdyq kólik parki jańartylyp, jolaıryqtar salynýda. Sonymen qatar jeke sektordaǵy úılerdi ortalyqtandyrylǵan jylý júıesine qosý máselesi pysyqtalyp jatyr, — dep habarlady Óskemen qalasy ákimdiginen.

Eske salsaq, osyǵan deıin ShQO-da jer úılerdegi órt byltyrǵydan 12%-ǵa kóp tirkelgeni habarlanǵan.