Óskemende ekinshi kún qatarynan qolaısyz meteorologııalyq jaǵdaı jarııalandy

ÓSKEMEN. KAZINFORM – Óskemen qalasynda erteń taǵy da qolaısyz meteorologııalyq jaǵdaı qalyptaspaq. 

Óskemendi qaıtadan tútin tumshalap barady. Sebebi kesheli beri jel soqpaı tur. «Qazgıdromed» RMK erteń taǵy da qolaısyz meteorologııalyq jaǵdaı qalyptasatynyn jarııa etti. 

— Búgin saǵat 20.00-den bastap 6 jeltoqsan 20.00-ge deıin Óskemende ekinshi dáreje týraly eskertý jarııalandy, — delingen habarlamada. 

Osy rette, turǵyndarǵa QMJ kezinde dalada uzaq júrmeı, páterdegi terezeler men jeldetkishterdi jaýyp otyrýǵa keńes berildi. Sondaı-aq qaınatylǵan, tazartylǵan nemese gazsyz mıneraldy sý men sháı iship, as sodasynyń eritindisimen tamaqty jıi shaıý qajet.

Eske salsaq, osyǵan deıin Óskemende ekologııa salasyna bólinetin qarajat kólemi ósetindigi habarlanǵan.