Óskemende ekiqabatty dámhana órtendi

ÓSKEMEN. QazAqparat – Óskemen qalasynda ekiqabatty dámhanadan órt shyqty, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, búgin saǵat 14:05-te Óskemen qalasyndaǵy Chehov kóshesinde ornalasqan ekiqabatty dámhanadan órt shyqty. Bes mınýttyń ishinde oqıǵa ornyna 6 tehnıka men 25 qutqarýshy jumyldyrylǵan.

«Birinshi jáne ekinshi qabattardyń arasyndaǵy aǵash tóbe janyp jatty. Zardap shekken eshkim joq. Órt sóndirýshiler tilsiz jaýdy saǵat 18:24-te tolyqtaı aýyzdyqtady. Ot shyqqan kezde dámhana ishinde tamaqtanýshylar bolmaǵan», - dep habarlady vedomstvo ókilderi.

Qyzyl jalynnyń jalpy aýdany – 70 sharshy metr. Órttiń naqty neden shyqqany áli anyqtalyp jatyr.