Óskemende eki jigit órtengen úıdiń terezesinen úsh adamdy alyp shyqty
ÓSKEMEN. QazAqparat – Óskemen qalasynyń eki turǵyny otqa oranǵan úıden 3 adamdy qutqardy, dep habarlaıdy QazAqparat.
6 sáýir kúni saǵat 15.12-de Popov kóshesindegi jer úıde órt shyqqan. Monshanyń aǵash qurylymdary, úıge jalǵanyp salynǵan qora-qopsy men úıdiń shatyry janǵan. Órt sóndirýshiler kelgenshe oqıǵa ornynda bolǵan shahar turǵyndary Aleksandr Strabykın men Aleksandr Kýznetsov qyzyl jalyn laýlaǵan úıden eki áıel men 8 jasar balany tereze arqyly syrtqa alyp shyqty.
«Beıbit kúnniń batyrlary tútin men otty baıqaǵap qalǵannan keıin birden kómekke umtylǵan. 3 adamdy qutqaryp, úı ishindegi gaz ballonyn shyǵarǵan. №7 órt sóndirý bóliminiń qyzmetkerleri 80 sharshy metr aýmaqty sharpyǵan órtti sóndirdi», - dep habarlady qalalyq Tótenshe jaǵdaılar basqarmasynyń baspasóz qyzmetinen.
Aleksandr Strabykın avtomalıar bolyp jumys isteıdi, al onyń dosy Aleksandr Kýznetsov «NPK Gerat ÝK» JShS-da óndiris basshysy.
«Ekeýi syn saǵatta ózderiniń emes, ózgeniń ómirin oılap, erlik jasady. Olardy qutqarý úshin batyl áreketke bardy», - delingen vedomstvo málimetinde.
