Óskemende eki er adam órtengen jer úıde qalyp qoıǵan 74 jastaǵy ájeni qutqardy

ÓSKEMEN. QazAqparat – Óskemen qalasynda eki er adam órtengen jer úıden 74 jastaǵy ájeni qutqaryp qaldy, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, Óskemendegi Bajov kóshesinde ornalasqan jer úıde órt shyqqan.

Úı tóbesiniń aǵash qurylymdary, shatyry, jıhaz, turmystyq tehnıka men jeke zattar janǵan.

«Órt sóndirýshiler kelgenge deıin úıdiń qasynan ótip bara jatqan er adam tútindi baıqap qalady. Ol úıdiń kórshisin oıatyp, ekeýi terezeni syndyryp, ishke kirgen. Bólmelerdi aralap shyqqanda qannen-qapersiz uıyqtap jatqan 74 jastaǵy ájeni kórip, ony syrtqa alyp shyǵady. Osylaısha, olar zeınetkerdiń ómirin saqtap qaldy», - delingen aqparatta.

Kóp uzamaı jetken qutqarýshylar jalpy aýdany 80 sharshy metrdi quraǵan tilsiz jaýdy tolyqtaı aýyzdyqtady.

Jeke quramnan barlyǵy 8 adam men 2 tehnıka jumyldyrylǵan.