Óskemende eki apta buryn joǵalyp ketken 57 jastaǵy er adam izdestirilýde

ÓSKEMEN. QazAqparat – Óskemen qalasynda eki apta buryn joǵalyp ketken 57 jastaǵy er adam izdestirilýde, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, «102» jedel arnasyna habarlasqan áıel aǵasynyń iz-tússiz joǵalyp ketkenin jetkizgen.

«Belgili bolǵandaı, Aıdar Sársembaev 5 aqpan kúni saǵat 21:00 shamasynda Kojedýba kóshesindegi úıinen syrtqa shyǵyp ketip, sol kúıi qaıtyp oralmady. 57 jastaǵy er adamnyń qaıda ekeni áli kúnge deıin belgisiz. Ol joǵalǵan kúni qara tústi ton men bórik kıip shyqqan», - dep habarlady vedomstvo ókilderi.

Qazirgi ýaqytta izdestirý jumystaryna eriktiler de jumyldyryldy. Tártip saqshylary bul azamattyń qaıda ekeni jaıly qandaı da bir habary barlardan 8-771-466-54-38 nómirine nemese «102» arnasyna qońyraý shalýdy suraıdy.