Óskemende eki aǵaıyndy jigit kórshilerin órtten qutqardy
ÓSKEMEN. QazAqparat – Óskemen qalasynda aǵaıyndylar kórshilerin órtten qutqaryp qalǵan, dep habarlaıdy QazAqparat.
Qalalyq Tótenshe jaǵdaılar basqarmasy baspasóz qyzmetiniń málimetine súıensek, 5 sáýir kúni túngi saǵat 02.00 shamasynda Tımofeev kóshesindegi jer úıdi qyzyl jalyn sharpyǵan. Muny kórgen aǵaıyndylar birden kórshilerine kómekke umtylady. Olar terezeni syndyryp, úı ishinde bolǵan eki er adam men áıeldi oıatqan.
«Beıbit kúnniń batyrlary Rafhat Qojahmetuly men Dastan Eleýsizov úıde adamdar bar ekenin bilgen soń órt sóndirýshilerdiń kelgenin tospady. Ekeýi de ózderi jaıly aqparat berýden jáne fotoǵa túsýden bas tartyp, bul erlikke ataq-abyroı úshin barmaǵandaryn aıtty», - dep habarlady vedomstvo ókilderi.
Oqıǵa ornyna jetken órt sóndirýshiler 30 sharshy metr aýmaqty sharshyǵan tilsiz jaýdy aýyzdyqtady. Aldyn ala boljam boıynsha, órttiń shyǵý sebebi – otty abaısyz paıdalaný nemese qasaqana órteý.
